ہرپل آن لائن نظر ہر خبر پر
دہرا دون:(ہرپل نیوز؍ایجنسی) 4؍فروری: اتراکھنڈ کے مشہور انکیتا بھنڈاری قتل واقعہ میں پوڑی پولیس کے ذریعہ سخت قدم اٹھانے کا راستہ صاف کر دیا گیا ہے۔ پوڑی کے ایس ایس پی نے اس قتل معاملہ کے کلیدی ملزم پلکت آریہ کی ملکیت قرق کرنے کی سفارش جاری کر دی ہے۔ اس تعلق سے ہریدوار اور پوڑی کے ضلع مجسٹریٹ کو رپورٹ بھی بھیج دی گئی ہے۔ میڈیا رپورٹس کے مطابق منظم طریقے سے گروہ بنا کر جرم انجام دینے والے انکتا قتل واقعہ کے ملزم پلکت آریہ کے خلاف گینگسٹر ایکٹ کے تحت کارروائی کی جا رہی ہے اور مجموعی طور پر تقریباً 2.75 کروڑ روپے کی ملکیت ضبط کرنے کے لیے ضلع مجسٹریٹ کو رپورٹ بھیجی گئی ہے۔
قابل ذکر ہے کہ نینی تال ہائی کورٹ نے مشہور انکیتا بھنڈاری قتل معاملہ کے کلیدی ملزم پلکت کے نارکو اور پالیگراف ٹیسٹ کرانے پر فی الحال روک لگا دی ہے۔ عدالت نے اس معاملے میں حکومت سے تین ہفتہ میں جواب مانگا ہے۔ عدالت نے اس معاملے پر آئندہ سماعت کے لیے تین ہفتہ بعد کی ہی تاریخ مقرر کی ہے۔
