ہرپل آن لائن نظر ہر خبر پر
سری نگر:(ہرپل نیوز؍ایجنسی)26؍جنوری:جموں وکشمیر نیشنل کانفرنس کے صدر ڈاکٹر فاروق عبداللہ نے بدھ کے روز کہا کہ محض الیکشن میں کامیابی حاصل کرنے کے لئے ملک میں جو نفرت کا ماحول پیدا کیا جا رہا ہے وہ ایک بہت ہی خطرناک اور تشویشناک رجحان ہے، جو اس ملک کو تباہی اور بربادی کی طرف لے کر جائے گا۔ ان باتوں کا اظہار پہلگام میں نامہ نگاروں سے بات چیت کے دوران کیا۔بھارت جوڑو یاترا سے متعلق پوچھے گئے سوال کے جواب میں ڈاکٹر فاروق عبداللہ نے کہا کہ اس وقت ملک میں بیحد نفرتیں پھیلائیں جارہی ہے، ہندوؤں، مسلمانوں، سکھوں، عیسائیوں اور دیگر مذاہب کے درمیان دوریاں پیدا کی جا رہی ہیں۔
ملک کے آئین کی خلاف ورزی ہو رہی ہے اور یہ رجحان اس ملک کی بنیادوں کو ہلا رہا ہے، اور بھارت جوڑو یاترا کا پیغام نفرتوں کو ختم کرنا اور وطن کو جوڑنا ہے جسے نفرت کے ذریعے توڑا گیا ہے۔فاروق عبداللہ نے کہا کہ یہ ملک یہاں کے رہنے والے ہر ایک باشندے کا ہے پھر چاہے، اس کا مذہب کوئی بھی اور وہ کسی بھی زبان میں کیوں نہ بات کرتا ہو۔ یہ ملک اسی صورت میں ترقی کرسکتا ہے جب ہم سب ایک ہوکر نہیں رہیں گے۔
صدر نیشنل کانفرنس نے مزید کہا کہ ہمارے یہاں بہت مشکلات آئے، ایسے مشکلات بھی آئے جب ہمارے پنڈت بھائیوں کو یہاں سے ہجرت کرنی پڑی ، میں دعا کرتا ہوں کہ یہاں ایسا ماحول قائم ہو کہ وہ اپنی من مرضی یہاں واپس آکر اپنے گھروں میں پھر سے خوشی اور عزت کے ساتھ رہ سکیں۔
