ہرپل آن لائن نظر ہر خبر پر
کولکاتہ:(ہرپل نیوز؍ایجنسی)24؍نومبر: سی اے اے کے نفاذ کو لے کر ملک میں ہنگامہ آرائی کے درمیان بنگال کی وزیر اعلیٰ ممتا بنرجی نے ایک بار پھر اس معاملے پر بڑا بیان دیا ہے۔ انہوں نے بدھ (23 نومبر) کو کہا کہ این آر سی کے نفاذ کی آڑ میں حراستی کیمپوں میں بھیجے جانے سے بچنے کے لیے یقینی بنائیں کہ آپ کا نام ووٹر لسٹ میں ہو۔ وزیر اعلیٰ ممتا بنرجی ریاستی حکومت کی طرف سے تمام اضلاع کے پسماندہ خاندانوں میں زمین کے پٹے (دستاویزات) تقسیم کرنے کے لیے منعقدہ پروگرام سے خطاب کر رہی تھیں۔
انہوں نے پروگرام میں 4701 زمین کے پٹے حوالے کئے۔ ممتا بنرجی نے کہا کہ یقینی بنائیں کہ آپ کا نام ووٹر لسٹ میں ہے، ورنہ آپ کو این آر سی کے نام پر حراستی کیمپ میں بھیج دیا جائے گا۔ یہ شرم اور انتہائی شرم کی بات ہے۔ممتا بنرجی نے مرکز پر منریگا کی رقم ادا نہ کرنے کا الزام لگایا۔ انہوں نے بی جے پی کا نام لیے بغیر کہا کہ مرکزی حکومت پارٹی کے کہنے پر کام کر رہی ہے۔
ریلوے اور ہوائی اڈے کے حکام کی طرف سے زبردستی زمین کے حصول کے واقعات کا ذکر کرتے ہوئے وزیر اعلیٰ نے کہا کہ بنگال میں مناسب معاوضہ اور بحالی کے بغیر کسی کو بے دخلی کی اجازت نہیں دی جائے گی۔ تقریب میں انہوں نے عوام سے احتجاج شروع کرنے کی اپیل کرتے ہوئے کہا کہ اگر آپ کی زمین زبردستی چھینی گئی تو ریاست آپ کے ساتھ ہوگی۔وزیر اعلیٰ ممتا بنرجی نے بھی بدھ کو آسام-میگھالیہ سرحد پر تشدد پر غم کا اظہار کیا۔ گزشتہ روز پیش آنے والے اس واقعے میں چھ افراد ہلاک ہو ئے تھے۔
