ہرپل آن لائن نظر ہر خبر پر
حیدرآباد:(ہرپل نیوز؍ایجنسی) 12؍مارچ:مرکزی وزیر داخلہ امیت شاہ نے کہا ہے کہ وزیراعظم مودی نے 5ٹریلین ڈالر کی معیشت کے ویڑن کی تجویز پیش کی ہے جس کے لئے بندرگاہوں،ایرپورٹس کا تحفظ کافی اہم ہے سی آئی ایس ایف، ان کے تحفظ کا کام گذشتہ 53برس سے کررہی ہے۔ انہوں نے ملک کے صنعتی یونٹس اور دیگر اداروں کے لئے بے لوث اور بے تکان خدمات انجام دینے والی سی آئی ایس ایف کی یوم تاسیس تقریب سے حکیم پیٹ، حیدرآباد میں خطاب کرتے ہوئے کہا کہ وزارت داخلہ تمام ٹکنالوجیز کے ساتھ سی آئی ایس ایف کومستحکم کرے گی تاکہ بندرگاہوں، ایرپورٹس وغیرہ کا تحفظ کیاجائے۔
کئی سی آئی ایس ایف ملازمین فرائض انجام دیتے ہوئے شہید ہوئے ہیں۔نکسلائٹس اور دہشت گردی کی سرگرمیاں سی آئی ایس ایف کی وجہ سے قابو میں ہے۔سی آئی ایس ایف کی یہ تقریب دہلی سے باہر پہلی مرتبہ منعقد کی گئی۔امیت شاہ نے تقریب کی صدارت کی اور سی آئی ایس ایف کی پریڈ کا معائنہ بھی کیا۔مسٹرشاہ نے کہا کہ سی آئی ایس ایف میں ہائبرڈ ماڈل کو متعارف کراتے ہوئے فورس کا دائرہ وسیع کیا جا رہا ہے۔ پچھلے چند برسوں میں جموں و کشمیر میں دہشت گردی، شمال مشرقی ریاستوں میں دراندازی اور بائیں بازو کے تشدد میں نمایاں کمی آئی ہے۔
وزیر داخلہ نے واضح کیا کہ آنے والے دنوں میں حکومت دہشت گردی کو قطعی برداشت نہیں کرے گی اور ملک کے مفادات کو نقصان پہنچانے والی قوتوں سے سختی سے نمٹے گی، جس میں سی آئی ایس ایف اہم کردار ادا کرے گی۔امیت شاہ نے کہا کہ سی آئی ایس ایف کے پاس صنعتی اور سیکوریٹی کے شعبوں کے ساتھ ساتھ منشیات اور دراندازی کو قابو میں کرنے درپیش چیلنجوں کا مؤثر طریقہ سے مقابلہ کرنے کی صلاحیت موجود ہے۔ قبل ازیں سی آئی ایس ایف کے ڈائریکٹر جنرل شیل وردھن سنگھ نے کہا کہ سی آئی ایس ایف اپنی مساعی کے ذریعہ ملک کو 5 ٹریلین کی معیشت بنانے میں اہم کردار ادا کر رہا ہے۔
